Switzerlan / Herofest 2018

Es isch e Wuche vergange sit däm es witers Highlight vom Jahr düre isch: d Switzerlan ir BEA Expo ds Bärn. Ungloublech sexy isches ume gsi. Huere viu Spass hets gmacht eifach üsem Hobby ds fröhne, ds game und chli mit de liebe Lüt ds plöiderle. Hie e chliine Rückblick us üsere Sicht:

Am Donnschtig ufe Mittag si dr NoBiggie und dr SwissMowglie a dr Switzerlan itroffe u hei mau ihrer Arbeitsgrät aka PC’s ufgsteut. Natürlech heis mir wahnsinnig gfiiret,  dass mir nid allei i dene 2000 Gamer ungergange si. Mir hei versterchig dür üsi liebi Community becho: folgendi Lüt hei sech zu üs gsetzt: Redan, Solid Winter, Hörndlimaa, Ralle, Woldo, Dr4v3, Dexo, Mintte, Solu90 und natürlech üses liebe Dinchen. Witer het ou der Plexi mit sinere Crew grad es paar Plätzli näbe de Noobs bsetzt. Das isch haut no eis öppis angers wemer zäme sone LAN darf bsueche, macht eifach no grad tuusig mau meh fröid. Nachem härzleche Begrüesse und am Ufbou vode PC’s heis mir de öppe 4 Stung speter ou fertig bracht mau es Ründeli z’game.

Leider het ds Internet nid geng eso wöue wie mir u zwüschine isch nix meh gange. Aber easy, de het mer haut chli witer plöiderlet u gfachsimlet. Wär brucht scho Internet anere LAN? D Noobs Connection ir Reihe L ir Halle 2 hets easy gno.

Immer wieder simer i nöii Gsichter und auti Bekannti inegloffe u zwüschine simer ou hurti ads Herofest übere go luege was d’Jungs und Mädels vom Geekstübli a ihrem Stand tribe hei. Cooli Sach, wär nid isch dert gsi,  het öppis verpasst (ussert dir heits i ihrem Livestream mitverfougt).

Dr Donnschtig hei mir eifach gnosse, chli chneble, flueche, lache u ploudere. Genau das womer aus Gamer so liebt!

Der Fritig isch grad steil gstartet, d Noobs wäre bimne Presserundgang iglade gsi. Leider het dr SwissMowglie im Hotel näbedran chli zguet pfüselet u isch untypischerwiis zspät cho. Aber mir hei grad no ds Wichtigschte mitbecho: Z’ Announcement vo der Swisscom Hero League.

Das wird e spannendi Sach, d ESL zieht zäme mit der Swisscom e Liga uf. Folgendi Title wärde verträte si: League of Legends, Hearthstone und Clash Royale.

Der Räscht vom Fritig isch öppe eso witergange wie der Donnschtig: game, schnurre u viu lache. Mir si no hurti dürs Herofest gloffe u hei no chli gfilmet da mir de no e Zämefassig uf Video wei usebringe. Da d SpooSpoo es Talänt ir Kamerafüehrig zeigt het, hei mir ihre churzerhand üsi GoPro id Hand drückt. Chöit de gspannt si. Am Abe isch no ds obligatorische Fondueässe ufem Programm gstange. När hei mir no höche Bsuech gha, dr Kiwi vom Helene Fischer Fan Club isch no chli cho zuechehöckle u mitspile. Es schiint daser üsem SESL PUBG Team gueti Tips het chönne gä, am nächste Tag isch nämlech es PUBG Turnier ufem Programm gstange.

Am Samschtig isches heiss worde für üses SESL PUBG Team. Der Captain NoBiggie het siner Jungs Ralle, Woldo und Dr4v3 guet igschwore, ca 8 Stung PUBG isch ufem Programm gstange. Die inzwüsche turniererfahreni Truppe het sech ir Quali düregsetzt und het dr Finalizug gschafft. Dert hei si e sackstarche Start häregleit u grad es Dinner ghout. Ir zwöite Rundi isch ihne ds Zoneglück nid hold gsi aber der Ralle het sech aus einzelne Überläbende unger d Top4 chönne wuschle. Das si ganz wichtigi Pünkt gsi, denn SilentGaming het mit Versterchig vom H4d3s ou es Chicken gholt. Ir dritte Rundi hei d Noobs ume ufträit u es witers Hüendli gschosse u si somit vorem letschte entscheidende Spiu ufem erschte Rang, ganz knapp vor SilentGaming gläge. Leider hets ganz knapp nid glängt, SilentGaming het abklärt gspiut obwohl si ungerwägs dr H4d3s verlore hei. Aber es Team wie SilentGaming cha ou denn no Headies verteile, dr Ownkel,  dr Elesde und dr Sjoo hei das Ding heita. Nume 42 Pünkt hei füre Turniersieg gfäut, es isch es ungloublech spannends Final gsi. E sensationelle 2. Platz vo 32 Teams het usegluegt und ds Team het es Prisgäut vo 200.- usegspiut, eifach nume no geil! Im Aschluss heimer aber d Chöpf nid la Hange u hei am H4d2s dr Schnaps furtgsoffe u zäme agstosse. Gratulation a dere Steu a SilentGaming füre verdient Sieg.

Zwüschine simer no churz eis a Stand vo der Geekstübli Truppe u hei derte no churz üser Chöpf id Kamera gstreckt fürs Streamerföteli. Dert hetmer aui wichtige Lüt troffe u churz chönne Gugus säge.

Am Sunntig hei mir no churz d Violina troffe, mir hei aber inzwüsche chliine schlächte Idruck gmacht wiu mir eifach aut si. Sone LAN Party isch eifach öppis geils aber ds Schlafmanko het üs zimlech hert troffe.

Nächer hei mir nümme viu uf d’Reihe bracht, fürs PC abboue u aune Ade zsäge hets no grad glängt. När isch die Switzerlan scho wieder Gschicht gsi.

Gärn würde mir hie d Näme vo aune coole Lüt ufschribe wo mir troffe hei, wiu jede Einzelne u jedi Einzelni würds so hert verdiene. Aber es si so viu gsi! Eifach z’viu für üs, mir chöis gar nümme ufschribe! Mir fröie üs eifach ufe nächscht Event u jedesmau we mir öpper vo öich gseh! Viu Liebi a aui, dir sit di Beschte!