News

PUBG SESL Winter Season

Nachem Winterschlaf erwache d Noobs u chöme us ihrere Höhli kroche. Viu Zyt hei si aber nid da die nöii PUBG Winter Season vor Swiss Esports League vor der Türe steit.

Bereits zum dritte Mau in Foug loufe d Noobs ufs Schlachtfäud u mässe sech mit de Beschte im PUBG. D Mannschaftsbsetzig gseht unverdänderet us, aber es si nöii Regle igfüehrt worde. Es wird meh Pünkt fürne Kill gä und generell wird e agressiveri Spielwiis gförderet. Was meint Teamcaptain NoBiggie zu dere Entwicklig? “Es wird uf aues balleret wosech bewegt” isch die pragmatischi Istellig vom Leader. Der Woldo meint glasse: “Es isch wies isch!”. Grundsätzlech si sech aber aui Spieler vom Team einig das d Rundine im allgemeine attraktiver zum luege wärde si und vilech ou nöii Strategie agwändet wärde.

Mir si gspannt uf hinech , ds luege gits das ab de 19:00 ufem Twitch Kanal vor SESL

 

PUBG SAN Invitational

Genau so isches! Nach der erschte Usgab vom SAN Invitational am Ostermäntig 2018 gits e Nöiuflag. Hüt am Nami weis d Schwizer Streamer wieder wüsse und wei zeige weles Duo das würklech ds Beschte vor Schwiz isch. Ds Teilnähmerfäud isch gspickt mit huere viu Witz, Talänt und Liebi aber wes ume Thron geit de kenne die Lüt ke Pardon. Nach vier Runde wärde mir wüsse weles Duo vo Streamer würklech die Beschte ir Schwiz si.

Damit dases nid nume um Ruhm und Ehre geit ungerstützt üs Brack und Daydeal bide Priise. Göht doch bi dene ou no go ineluege, ufe Link drücke isch scho fasch Pflicht! 😉

De gits nid viu meh derzue zsäge aus GLHF (Good Luck, Have Fun).

Switzerlan / Herofest 2018

Es isch e Wuche vergange sit däm es witers Highlight vom Jahr düre isch: d Switzerlan ir BEA Expo ds Bärn. Ungloublech sexy isches ume gsi. Huere viu Spass hets gmacht eifach üsem Hobby ds fröhne, ds game und chli mit de liebe Lüt ds plöiderle. Hie e chliine Rückblick us üsere Sicht:

Am Donnschtig ufe Mittag si dr NoBiggie und dr SwissMowglie a dr Switzerlan itroffe u hei mau ihrer Arbeitsgrät aka PC’s ufgsteut. Natürlech heis mir wahnsinnig gfiiret,  dass mir nid allei i dene 2000 Gamer ungergange si. Mir hei versterchig dür üsi liebi Community becho: folgendi Lüt hei sech zu üs gsetzt: Redan, Solid Winter, Hörndlimaa, Ralle, Woldo, Dr4v3, Dexo, Mintte, Solu90 und natürlech üses liebe Dinchen. Witer het ou der Plexi mit sinere Crew grad es paar Plätzli näbe de Noobs bsetzt. Das isch haut no eis öppis angers wemer zäme sone LAN darf bsueche, macht eifach no grad tuusig mau meh fröid. Nachem härzleche Begrüesse und am Ufbou vode PC’s heis mir de öppe 4 Stung speter ou fertig bracht mau es Ründeli z’game.

Leider het ds Internet nid geng eso wöue wie mir u zwüschine isch nix meh gange. Aber easy, de het mer haut chli witer plöiderlet u gfachsimlet. Wär brucht scho Internet anere LAN? D Noobs Connection ir Reihe L ir Halle 2 hets easy gno.

Immer wieder simer i nöii Gsichter und auti Bekannti inegloffe u zwüschine simer ou hurti ads Herofest übere go luege was d’Jungs und Mädels vom Geekstübli a ihrem Stand tribe hei. Cooli Sach, wär nid isch dert gsi,  het öppis verpasst (ussert dir heits i ihrem Livestream mitverfougt).

Dr Donnschtig hei mir eifach gnosse, chli chneble, flueche, lache u ploudere. Genau das womer aus Gamer so liebt!

Der Fritig isch grad steil gstartet, d Noobs wäre bimne Presserundgang iglade gsi. Leider het dr SwissMowglie im Hotel näbedran chli zguet pfüselet u isch untypischerwiis zspät cho. Aber mir hei grad no ds Wichtigschte mitbecho: Z’ Announcement vo der Swisscom Hero League.

Das wird e spannendi Sach, d ESL zieht zäme mit der Swisscom e Liga uf. Folgendi Title wärde verträte si: League of Legends, Hearthstone und Clash Royale.

Der Räscht vom Fritig isch öppe eso witergange wie der Donnschtig: game, schnurre u viu lache. Mir si no hurti dürs Herofest gloffe u hei no chli gfilmet da mir de no e Zämefassig uf Video wei usebringe. Da d SpooSpoo es Talänt ir Kamerafüehrig zeigt het, hei mir ihre churzerhand üsi GoPro id Hand drückt. Chöit de gspannt si. Am Abe isch no ds obligatorische Fondueässe ufem Programm gstange. När hei mir no höche Bsuech gha, dr Kiwi vom Helene Fischer Fan Club isch no chli cho zuechehöckle u mitspile. Es schiint daser üsem SESL PUBG Team gueti Tips het chönne gä, am nächste Tag isch nämlech es PUBG Turnier ufem Programm gstange.

Am Samschtig isches heiss worde für üses SESL PUBG Team. Der Captain NoBiggie het siner Jungs Ralle, Woldo und Dr4v3 guet igschwore, ca 8 Stung PUBG isch ufem Programm gstange. Die inzwüsche turniererfahreni Truppe het sech ir Quali düregsetzt und het dr Finalizug gschafft. Dert hei si e sackstarche Start häregleit u grad es Dinner ghout. Ir zwöite Rundi isch ihne ds Zoneglück nid hold gsi aber der Ralle het sech aus einzelne Überläbende unger d Top4 chönne wuschle. Das si ganz wichtigi Pünkt gsi, denn SilentGaming het mit Versterchig vom H4d3s ou es Chicken gholt. Ir dritte Rundi hei d Noobs ume ufträit u es witers Hüendli gschosse u si somit vorem letschte entscheidende Spiu ufem erschte Rang, ganz knapp vor SilentGaming gläge. Leider hets ganz knapp nid glängt, SilentGaming het abklärt gspiut obwohl si ungerwägs dr H4d3s verlore hei. Aber es Team wie SilentGaming cha ou denn no Headies verteile, dr Ownkel,  dr Elesde und dr Sjoo hei das Ding heita. Nume 42 Pünkt hei füre Turniersieg gfäut, es isch es ungloublech spannends Final gsi. E sensationelle 2. Platz vo 32 Teams het usegluegt und ds Team het es Prisgäut vo 200.- usegspiut, eifach nume no geil! Im Aschluss heimer aber d Chöpf nid la Hange u hei am H4d2s dr Schnaps furtgsoffe u zäme agstosse. Gratulation a dere Steu a SilentGaming füre verdient Sieg.

Zwüschine simer no churz eis a Stand vo der Geekstübli Truppe u hei derte no churz üser Chöpf id Kamera gstreckt fürs Streamerföteli. Dert hetmer aui wichtige Lüt troffe u churz chönne Gugus säge.

Am Sunntig hei mir no churz d Violina troffe, mir hei aber inzwüsche chliine schlächte Idruck gmacht wiu mir eifach aut si. Sone LAN Party isch eifach öppis geils aber ds Schlafmanko het üs zimlech hert troffe.

Nächer hei mir nümme viu uf d’Reihe bracht, fürs PC abboue u aune Ade zsäge hets no grad glängt. När isch die Switzerlan scho wieder Gschicht gsi.

Gärn würde mir hie d Näme vo aune coole Lüt ufschribe wo mir troffe hei, wiu jede Einzelne u jedi Einzelni würds so hert verdiene. Aber es si so viu gsi! Eifach z’viu für üs, mir chöis gar nümme ufschribe! Mir fröie üs eifach ufe nächscht Event u jedesmau we mir öpper vo öich gseh! Viu Liebi a aui, dir sit di Beschte!

Swiss eSports League – PUBG Premier League Fall Season 2018

D Swiss eSports League (SESL) startet im Battle Royale Shooter Playerunknowns Battleground (PUBG) d Fall Season 2018. Wieder mitmischle tuet ou ds Team ume Captain NoBiggie.

Streams von der Fantasy Basel
Der Stream sollte auf einem dieser Kanäle übertragen werden
All streams are currently offline.
Loading...

Nachdäm das sech ds Team vode SwissAngryNoobs ir Spring Season ufem guete 6. Rang für  d Fall Season diräkt qualifiziert hei, trätte si itz ire liecht angere Formation a. Blibe isch der NoBiggie im Amt als Captain und Shotcaller sowie der hert Chärn mitem Dr4v3 und ds Duo infernale Woldo und Ralle. Der Stand-in Player Aende wird die Season meh spile, leider nöi fürs Team “The Random Factor” ume Streamer MlxPCH.

Losgah tuet das ganze hinech (07.10.) uf die 19:00. Ds Gwinne gits i dere Liga füre Sieg es Prisgäud vo CHF 280.00, für zwöitplaziert CHF 140.00 und füre drittplaziert 40 Fränkli… D Konkurränz wird ou die Season brutal si, aber d Jungs wärde aues gä!

Normalerwiis isch das Spektakel ufem Twitch Kanal vo der SESL ds gseh. Cheeret aständig für üser Boys!

 

Clash of the Noobs – Statistike vor Season

D Season isch itze scho es paar Täg verbi und mir hei das chönne la Revue passiere. D Noobs hei das mau chli gneuer unger d Lupe gno was da so aues isch abgange u hei das für aui Zahlefetischischte ines chliises Brichtli packt:

Mir si i dere Season 7 mau online gis und hei im ganze knappi 18 Stung gstreamet. I dere Zyt isch folgendes passiert:

Durchschnittlech hei mir pro Stream ungloublechi 185 Zueschouer dörfe begrüesse. Bim Start vom Ravioli Cup II hei mir sagehafti 244 Zueschouer im Verlouf vom Stream dörfe ungerhaute.

Wos im Final vom Ravioli Cup umd Wurscht gange isch hei mir bis zu 75 Zueschouer glichzytig uf üsem Kanal gha. Das isch für Schwiizerdütschi Verhältnis eifach nume no krass!

Im gsamte isch i dere Season ds Gschrei vode Noobs 1098 Stung konsumiert worde (Source: Sullygnome.com). Wemer 1 Person würdi asteue wo üs söfu lang müessti zueluege wär die armi Seel es haubs Jahr beschäftiget!

D Währig “Nobbels” isch heisser im Trend aus aui Kyptowährige: 360 uf Twitch regischtrierti Nutzer hei 22153 Nobbels gfarmt. Ir nächschte Season mache mir gloubs de e Bank uf.

I dere Zyt hei d Zueschouer ou der Chat rege gnützt: Pro Stream si durchschnittlech 1190 Nachrichte abgsetzt worde, im gsamte isch dr Chat abgange wie es Zäpfli und het 8329 Nachrichte abgschickt. Das muessme de zersch no aues läse!

I dere Season hets ou nöii 29 Chuderluuris (Followers) gäh, wiukomme bide Noobs. U der Subtember het völlig igschlage u mir hei 61 mau dörfe Subs verkünde und entgäge näh! Heiligs Blechle, das isch angers abgange. A dere Stell no es grosses Merci ad Gioia, a Sneeze und a Andy für die verschänkte Subs! Dir aui sit eifach nume no liebi!

Und offesichtlech hei d Noobs mau wieder huere viu gfailed, es het i dere Season 78 clipwürdigi Szene gäh und die si ou scho über 500 mau gluegt worde! Merci a aui Clipper!

Ou we mir üs wiederhole: Mir si ungloublech dankbar für öie Support, das isch eifach nume no e Troum was mir da mit öich zäme dörfe erläbe!

(Quelle: Twitch Dashboard und Chatbot)

Clash of the Noobs – Championship Season Ende

Üsi vierti Season “Clash of the Noobs – Championship Season” isch erfolgrich ds Änd gange. Ungloublech sexy isches gsi, merci Tuusig fürs ineluege und mitmache bi üsne Gwinnspili.

Der Ravioli Cup II het dr MutzeMischt vom Geekstübli für sich entschide, siner Fahrkünscht si eifach zwifusohni die Beschte gsi! Der Mintte het sech der zwöit Platz gsicheret und der Vorjahressieger NoBiggie ufe dritt Platz verwise. Der SwissMowglie het zwar Verbesserige zeigt aber es het i däm Teilnähmerfäud nume füre 4. Platz glängt.

Ds Wettbüro ume Raviolicup II hei folgendi Lüt gwunne wo richtigerwiis ufe MutzeMischt gsetzt hei: AemJay, Solu90 und der Dr4v3. Die 3 Herre dörfe sich us üsem Shop öppis useläse. D Noobs gratuliere ganz härzlech!

Der NoBiggie het somit 2 Pünkt und der SwissMowglie 1 Punkt i die witeri Season mitgno. Dert isches hert zue u här gange. Im Wreckfest isches huere luschtig gsi u när het dr SwissMowglie im Super Mega Baseball 2 und im NBA Playgrounds siner Talänt zeigt. So si die zwe Kontrahänte mitemne unentschide zum finale Showdown i letscht Stream vor Season gstartet.

D Season isch de im Golf-it zu Gunschte vom NoBigge entschide worde, d Mitspiler hei der NoBiggie zum verdiente Sieg carried und die ungloublech luschtigi Season zum ne Ändi bracht.

Ds Wettbüro ume Gsamtsieg vo dere Season hei folgendi Lüt für sich entschide: SenfPenner, whitelemur94 und der k0bra. Ou sich chöi sech öppis us üsem Shop useläse, härzlechi Gratulation ou a dere Steu a die verdiente Gwinner.

Der Sieg im Nobbelwar het der Beckicious ganz knapp vor der Fali1911 für sich chönne entscheide, är het si Gwinn aber grosszügigerwiis a 4. platziert Phippu5 witergä und dä wiederum ads 5. platzierte Dinchen. Es grosses Merci für die generösi Tat a die zwe Herre! Ufem 3. Platz het sech der Autsaidah fürs letschte Giveaway vo dere Season chönne haute. Natürlech dörfe ou die Gwinner es Goodie us üsem  Shop useläse!

D Season isch ds Ändi gange, es het ungloublech Spass gmacht. Merci fürs cho ineluege, mitfiebere u lärm mache. Dir sit eifach die Beschte!

Podcast im Lokalradio Neo1

Es isch immer es bitzeli speziell we ds Telefon lütet und ds Radio am angere Ändi dranne isch. So isches am SwissMowglie passiert, är het imne Interview chli über ds Streame dörfe ploudere. Hie isch ds Ergäbniss vo dere coole Erfahrig. Merci ads Neo 1 Team, speziell am Sven Düscher für das sehr agnähme Interview.

Ravioli Cup II – Season Start

Hinech geits los, die nöii Season startet ca am 19:45 uf üsem Twitchkanal.

Mir starte mitem Ravioli Cup II wo der Vorjahressieger NoBiggie uf siner Challenger MutzeMischt, Mintte und der SwissMowglie wartet. D Rennstrecke im F1 2018 si no ke Monet aut u wärde scho arg i Mitleideschaft zoge we die 4 Fahrer ume Sieg kämpfe!

Ds Wettbüro isch no bis churz vorem Stream offe, dir chöit no uf öie Lieblingsstreamer go setze:

Der MutzeMischt het no es chliises Heissmacherli uf Youtube ufeglade! Merci Mutze!